main us ki anjuman mein akela nahin gaya
jo main gaya to phir koi tanha nahin gaya
main chahta tha us ki nigahon se khelna
lekin zara si der bhi khela nahin gaya
mumkin nahin tha husn o nazar ka muwazana
mujh se to us ko Thik se dekha nahin gaya
tahwil mein kisi ki pahunch ke hai KHush wo dil
jis ko kisi maqam par rakkha nahin gaya
donon taraf thi ek shikayat likhi hui
chaha kabhi gaya kabhi chaha nahin gaya
Ghazal
Main uski anjuman mein akela nahin gaya
Zeeshan Sahil