main jab bhi chhune lagun tum zara pare ho jao
ye kya ki lams mein aate hi dusre ho jao
ye kar-e-ishq magar hum se kaise sarzad ho
alaw tez hai sahab zara pare ho jao
tumhaari umr bhi us aab ke hisab mein hai
nahin ki us ke barasne se tum hare ho jao
ye gosha-gir tabiat bhi ek mahbas hai
hawa ke lams mein aao hare-bhare ho jao
kabhi to matla-e-dil se ho itni barish-e-ashk
ki tum bhi khul ke baraste hue khare ho jao
Ghazal
Main jab bhi chhune lagun tum zara pare ho jao
Aftab Iqbal Shamim