mahjur koi baat dilerana likhega
shaer na bana to koi afsana likhega
har ghuncha-e-azad numu paega apni
gulshan ki har ek baat judagana likhega
duniya ka jo manzar hai wo sangin paDa hai
har ahl-e-nazar us ko farebana likhega
tum kya kisi tariKH ko tabdil karoge
insan ka dil sail ka parwana likhega
parde jo uThenge to muarriKH ka qalam bhi
tahzib ke daman pe kya kya na likhega
sazish ki bunat KHun ke taron se hui hai
mazlum ka KHun us ko bahimana likhega
indhan ke liye aatish o aahan ka bahana
asrar-e-haqiqat koi diwana likhega
ehsas ke marqad ka mujawar koi hoga
saffak ko jo dilbar-e-jaanana likhega
Ghazal
Mahjur koi baat dilerana likhega
Mohammad Khalid