Madrasa ya dair tha ya kaba ya but-KHana tha

madrasa ya dair tha ya kaba ya but-KHana tha
hum sabhi mehman the wan tu hi sahab-KHana tha

wae nadani ki waqt-e-marg ye sabit hua
KHwab tha jo kuchh ki dekha jo suna afsana tha

haif! kahte hain hua gulzar taraj-e-KHizan
aashna apna bhi wan ek sabza-e-begana tha

ho gaya mehman-sara-e-kasrat-e-mauhum aah
wo dil-e-KHali ki tera KHas KHalwat-KHana tha

bhul ja KHush rah abas we sabiaqe mat yaad kar
'dard'! ye mazkur kya hai aashna tha ya na tha