کیوں خیال رنج و راحت سے نہ ہوں بیگانہ ہم

کیوں خیال رنج و راحت سے نہ ہوں بیگانہ ہم
جلوہ گاہ یار ہے دل یعنی خلوت خانہ ہم

ہیں کبھی واعظ کبھی ہیں مرشد مے خانہ ہم
گھومتے جاتے ہیں حسب گردش پیمانہ ہم

لاکھ پر بھاری ہیں تیری دستگیری چاہئے
کیوں کسی پہ بار ہوں اے ہمت مردانہ ہم

کھائیے یہ زہر کب تک کھائے جاتی ہے یہ زیست
اے اجل کب تک رہیں گے رہن آب و دانہ ہم

تو ہمیں کہتا ہے دیوانہ تو دیوانے سہی
پند گو آخر تجھے اب کیا کہیں دیوانہ ہم

مدعی دل عشق آئین و عدالت بزم ناز
دید بازی جرم مجرم آنکھ ہے جرمانہ ہم

آب اشک و آتش شوق و ہوائے آہ سے
ہیں وجود آرائی خاکستر پروانہ ہم

گم ہے نام عامری خوب اے نگاہ سامری
تیرے افسوں سے بنے ہیں زینت افسانہ ہم

وجہ رسوائی ہے ناطقؔ مستیٔ بزم سخن
بادہ پیما ہیں بجام غالب مستانہ ہم