کیوں ہو نہ گر کے کاسۂ تدبیر پاش پاش

کیوں ہو نہ گر کے کاسۂ تدبیر پاش پاش
ہے سنگ غم سے شیشۂ تقدیر پاش پاش

ہے خون بے گنہ سے جگر ریش تیغ بھی
جوہر نہیں یہ ہے تن شمشیر پاش پاش

تیر نگہ نے دل مرا غربال کر دیا
زخموں سے ہو گیا تن نخچیر پاش پاش

تیغ زبان یار سے مجروح ہے جگر
ہوتا ہے دل مرا دم تقریر پاش پاش

اے تیغ کلک لکھ وہ مضامین طعنیہ
دل حاسدوں کے ہوں دم تحریر پاش پاش

زیباؔ غزل تو تم نے کہی اس زمیں میں خوب
ثابت ہر اک جگہ ہے بہ تدبیر پاش پاش