کیا زمیں کیا آسماں کچھ بھی نہیں

کیا زمیں کیا آسماں کچھ بھی نہیں
ہم نہ ہوں تو یہ جہاں کچھ بھی نہیں

دیدہ و دل کی رفاقت کے بغیر
فصل گل ہو یا خزاں کچھ بھی نہیں

پتھروں میں ہم بھی پتھر ہو گئے
اب غم سود و زیاں کچھ بھی نہیں

کیا قیامت ہے کہ اپنے دیس میں
اعتبار جسم و جاں کچھ بھی نہیں

کیسے کیسے سر کشیدہ لوگ تھے
جن کا اب نام و نشاں کچھ بھی نہیں

ایک احساس محبت کے سوا
حاصل عمر رواں کچھ بھی نہیں

کوئی موضوع سخن ہی جب نہ ہو
صرف انداز بیاں کچھ بھی نہیں