Koft se jaan lab pe aai hai

koft se jaan lab pe aai hai
hum ne kya choT dil pe khai hai

likhte ruqa likhe gae daftar
shauq ne baat kya baDhai hai

aarzu us buland o baala ki
kya bala mere sar pe lai hai

didani hai shikastagi dil ki
kya imarat ghamon ne Dhai hai

hai tasanno ki lal hain we lab
yani ek baat si banai hai

dil se nazdik aur itna dur
kis se us ko kuchh aashnai hai

be-sutun kya hai kohkan kaisa
ishq ki zor aazmai hai

jis maraz mein ki jaan jati hai
dilbaron hi ki wo judai hai

yan hue KHak se barabar hum
wan wahi naz o KHud-numai hai

aisa mauta hai zinda-e-jawed
rafta-e-yar tha jab aai hai

marg-e-majnun se aql gum hai 'mir'
kya diwane ne maut pai hai