kisi tarik goshe mein basar hogi hamari
mahal mein tujh ko pal pal ki KHabar hogi hamari
ajab ek sehr hoga jaan deti bebasi mein
farishton ki tasalli chaaragar hogi hamari
shuaon ki sawari nur ki raftar hogi
magar ek KHak-zadi ham-safar hogi hamari
jahanon ke safar hain aur sitaron se sanad hai
ghazal mein har riwayat mo'tabar hogi hamari
chhupe honge zamin ta-asman is mein tilismat
ba-zahir go hikayat muKHtasar hogi hamari
Ghazal
Kisi tarik goshe mein basar hogi hamari
Mohammad Izhar ul Haq