KHulasa ye mere haalat ka hai
ki apna sab safar hi raat ka hai
ab ek rumal mere sath ka hai
jo meri walida ke hath ka hai
ana kya ijz ko girdab samjho
baDa gahra samundar zat ka hai
KHuda ashaar-e-rasmi se bachae
ye qatl-e-am sachchi baat ka hai
tapish kitni hai man ke aansuon mein
ye pani kaun si barsat ka hai
mujhe behtar hai kachchi qabr apni
kisi gumbad se jo KHairaat ka hai
Ghazal
KHulasa ye mere haalat ka hai
Syed Zameer Jafri