KHudi kam zindagi mein gham bahut hain
yahi hai imtihan to hum bahut hain
hamara dard chehre se ayan hai
hamare dard ke mahram bahut hain
hui hamwar kis se rah-e-hasti
abhi tak is mein pech o KHam bahut hain
zaruri to nahin ek fasl-e-gul ho
junun ke aur bhi mausam bahut hain
bahut hain rone wale gulsitan par
sharik-e-girya-e-shabnam bahut hain
meri palkon pe raushan hain jo aansu
mujhe ai dida-e-pur-nam bahut hain
nahin ek aalam-e-sham-e-judai
nazar mein aur bhi aalam bahut hain
Ghazal
KHudi kam zindagi mein gham bahut hain
Karamat Bukhari