KHud ko nazar ke samne la kar ghazal kaho
is dil mein koi dard biTha kar ghazal kaho
ab tak to mai-kadon pe hi tum ne ghazal kahi
honTon se ab ye jam haTa kar ghazal kaho
mahfil mein aaj shama jalane ke din gae
tarikiyon mein dil ko jala kar ghazal kaho
ghazalen bhi aadmi ki ibaadat hain dosto
is ishq ki nadi mein naha kar ghazal kaho
rah to liye ho itne dinon chandni ke sath
ab zindagi ki dhup mein aa kar ghazal kaho
koi tumhaare dil mein na utre to ai 'kunwar'
tum hi kisi ke dil mein sama kar ghazal kaho
Ghazal
KHud ko nazar ke samne la kar ghazal kaho
Kunwar Bechain