Kaun in lakhon adaon mein mujhe pyari nahin

kaun in lakhon adaon mein mujhe pyari nahin
nam lun kis kis ka mujh ko ek bimari nahin

aag kitni le ke nikla tha mera dud-e-jigar
wo faza hai kaun jis mein koi chingari nahin

yas se kyun dekhte hain dost ai aazar-e-dil
puchhte hain kya mujhe to koi bimari nahin

hath rakh kar ek zara dekho tap-e-gham ka asar
ye tumhaara hi jalaya dil hai chingari nahin

dil ne rag rag se chhupa rakkha hai tera raaz-e-ishq
jis ko kah de nabz aisi meri bimari nahin

qaid ho kar main ne kholi ham-safiron ki zaban
kis gulistan mein mera zikr-e-giraftari nahin