کیسے رفو ہوں چاک گریباں میں بھی سوچوں تو بھی سوچ

کیسے رفو ہوں چاک گریباں میں بھی سوچوں تو بھی سوچ
اپنے اپنے درد کا درماں میں بھی سوچوں تو بھی سوچ

جس کے لئے اک عمر سے لمبی کاٹی ہم نے کالی رات
صبح وہ کیوں ہے شام بداماں میں بھی سوچوں تو بھی سوچ

میرے لہو سے نقش ہوئی ہے میری ہی تصویر مگر
کس کا ہے یہ شوق نگاراں میں بھی سوچوں تو بھی سوچ

روز افزوں ہے میری تمنا اور ترا بیگانہ پن
اس بے ربط سی نظم کا عنواں میں بھی سوچوں تو بھی سوچ

زخموں کے خوں رنگ اجالے مجھ کو ہی مرغوب سہی
کون ہے ان زخموں میں فروزاں میں بھی سوچوں تو بھی سوچ

گھر کی منڈیروں تک برپا ہے دیوالی کا سارا جشن
کیسے ہو اندر بھی چراغاں میں بھی سوچوں تو بھی سوچ

دل نے بھی تھک ہار کے آخر در دروازے بند کیے
کون ہو اب اس غم کا نگہباں میں بھی سوچوں تو بھی سوچ

ان کے آگے پھیلا ہوا تھا دست تمنا اے اسرارؔ
یا کہ تہ خنجر تھی رگ جاں میں بھی سوچوں تو بھی سوچ