kabhi mili hai jo fursat to ye hisab kiya
sawab kitne kiye kitna irtikab kiya
hamesha apne amal ka KHud ehtisab kiya
KHud apne aap ko aise bhi be-naqab kiya
tamam umr bhaTakte rahe gumanon mein
wo shai mili hi nahin jis ka intiKHab kiya
daraaz kar na sake phir bhi kasa-e-ghairat
tarah tarah se tabiat ne be-hijab kiya
kabhi to zabt ne dariya ko kar diya sahra
kabhi junun ne bhi sahra ko aab aab kiya
alag na ho saka dil yaad-e-raftagan se kabhi
tere KHayal se har-chand ijtinab kiya
ye zindagi hamein kaise muaf kar deti
wo waqt waqt tha hum ne jise KHarab kiya
jawab de gain sari zihanaten 'salim'
kisi sawal ne ta-umr la-jawab kiya
Ghazal
Kabhi mili hai jo fursat to ye hisab kiya
Salim Shuja Ansari