kali kali ghaTa barasti hai
aaj kya lutf-e-mai-parasti hai
KHush lage dil ko kyun na virana
aashiqon ki yahi to basti hai
aaj mahfil mein ye KHayal rahe
kis ki jaanib se pesh-dasti hai
jab ki is ka bhi hai maal yahi
mai-parasti bhi faqa-masti hai
ek tir-e-nazar idhar maro
dil tarasta hai jaan tarasti hai
bosa milta hai jaan ke badle
'mashriqi' KHub jins sasti hai
Ghazal
Kali kali ghaTa barasti hai
Sardar Genda Singh Mashriqi