جگر سے جان سے پیارے کہاں ہے کچھ تو بتا

جگر سے جان سے پیارے کہاں ہے کچھ تو بتا
ہر ایک دل کے سہارے کہاں ہے کچھ تو بتا

تری تلاش میں کھوئی ہوئی ہے چشم فلک
زمیں کے راج دلارے کہاں ہے کچھ تو بتا

مسرتوں سے تھا لبریز دل کا پیمانہ
مری خوشی کے سہارے کہاں ہے کچھ تو بتا

جو تو نہیں ہے تو پھیلی ہوئی ہے تاریکی
مرے چمکتے ستارے کہاں ہے کچھ تو بتا

دل رئیسؔ کو ہے کیف زندگی کی تلاش
حیات نو کے اشارے کہاں ہے کچھ تو بتا