jhaTak ke chal nahin sakta hun tere dhyan ko main
uThae phirta hun sar par ek aasman ko main
main tujh se apna talluq chhupa nahin sakta
jabin se kaise miTa dun tere nishan ko main
ye log mujh se udasi ki wajh puchhte hain
bata chuka hun tera nam ek jahan ko main
jo ahd kar ke har ek ahd toD Dalta hai
zaban dunga bhala aise be-zaban ko main
main fath kar ke koi qila kya karunga 'salim'
lo aaj toDta hun tir ko kaman ko main
Ghazal
JhaTak ke chal nahin sakta hun tere dhyan ko main
Mohammad Saleem Tahir