jab wo but ham-kalam hota hai
dil o din ka payam hota hai
un se hota hai samna jis din
dur hi se salam hota hai
dil ko rokun ki chashm-e-giryan ko
ek hi KHub kaam hota hai
aap hain aur majma-e-aghyar
roz darbar-e-am hota hai
zist se tang hain na chheD hamein
dekh ghussa haram hota hai
lije musa se lan-tarani ki
ab to hum se kalam hota hai
'dagh' ka nam sun ke wo bole
aadmi ka ye nam hota hai
Ghazal
Jab wo but ham-kalam hota hai
Dagh Dehlvi