جب ہے مٹنا ہی تو انداز حکیمانہ سہی

جب ہے مٹنا ہی تو انداز حکیمانہ سہی
خلوت غم کے عوض گوشۂ مے خانہ سہی

رونق بادہ کشی جرأت رندانہ سہی
خار ہونا ہے تو مے خانہ بہ مے خانہ سہی

عشق اک قطرے میں دریا کو سمو دیتا ہے
عقل کو دیوانہ سمجھتی ہے تو دیوانہ سہی

میرے دل میں بھی تجلی کے خزینے ہیں نہاں
ماہ و خورشید میں عکس رخ جانانہ سہی

فرصت شوق غنیمت ہے اٹھا بھی ساغر
زندگی ایک چھلکتا ہوا پیمانہ سہی

کیا خبر تھی کہ مئے ناب میں اتنا ہے سرور
اب جو پی لی ہے تو اک اور بھی پیمانہ سہی

میری وارفتہ نگاہی کی بھی کچھ قیمت ہے
بزم کی بزم رخ یار کا پروانہ سہی

فکر و احساس میں پوشیدہ ہیں اسرار حیات
بال و پر قوت پرواز سے بیگانہ سہی

یہی کیا کم ہے کہ برباد محبت ہے رئیسؔ
تیرے الطاف و عنایات سے بیگانہ سہی