Jaanen mushtaqon ki lab par aaiyan

jaanen mushtaqon ki lab par aaiyan
balbe zalim teri be-parwaiyan

subh hone aai raat aaKHir hui
bas kahan tak shoKHiyan machlaiyan

bis bhari nagin hai kya hi zulf-e-yar
jis ko dekh afi ne lahren khaiyan

jeb to kya naseha daman ki bhi
dhajjiyan kar ishq ne dikhlaiyan

sada-rui hi ghazab thi tis upar
karte ho har lahza husn-araiyan

us saman-andam gul-ruKHsar ki
jaan-faza nikhat chura kar laiyan

sun ke ye baad-e-saba ne bagh mein
gaThriyan ghunchon ki phir khulwaiyan

leTa chhati par meri leta tha wo
aah kis kis aan se angDaiyan

is samay ko dekh kar sau rashk se
mauj ne dariya pe lahren khaiyan

dekhte hi us ko shaida ho gaya
kya huin 'bedar' wo danaiyan