Jae KHirad nahin hai ki farzana chahiye

jae KHirad nahin hai ki farzana chahiye
hu ka maqam hai koi diwana chahiye

hai is mein qaid-e-shahr na virana chahiye
bahr-e-faragh tab-e-faqirana chahiye

gunjaish-e-tasawwur-e-yak-lafz bhi nahin
yan har kisi ke waste afsana chahiye

yan har qadam hai mahshar-e-imkan-e-nau-ba-nau
yan har qadam pe sajda-e-shukrana chahiye

jab tak ki hain zamane mein hum se KHarab log
masjid kahin kahin koi mai-KHana chahiye

malum hai KHuda ko jo haalat dilon ki hai
ai shaiKH hum faqiron pe fatwa na chahiye

rakhte hain 'anjum' aap jo auron ke waste
apne liye bhi to wahi paimana chahiye