ishq tak apni dastaras bhi nahin
aur dil mail-e-hawas bhi nahin
ab kahan jaenge KHarab-e-bahaar
aashiyan bhi nahin qafas bhi nahin
barq ki bekasi ko rota hun
ab nasheman mein KHar-o-KHas bhi nahin
kis ne dekha shaguftagi ka maal
zindagi itni dur-ras bhi nahin
hum asiron ke waste sarshaar
rasm-e-pabandi-e-qafas bhi nahin
Ghazal
Ishq tak apni dastaras bhi nahin
Sarshar Siddiqui