is se pahle ki charaghon ko wo bujhta dekhe
us se kahna ki wo aae mera chehra dekhe
us se kahna mere chehre se ye aankhen le jae
us se kahna ki kahan tak koi rasta dekhe
main ne dekha hai samundar mein utarta suraj
us se kahna ki mashiyyat ka ishaara dekhe
us se kahna ye munadi bhi kara di jae
koi is ahd mein ab KHwab na sachcha dekhe
ek muddat se in aankhon mein koi KHwab nahin
us se kahna wo koi KHwab na aisa dekhe
us se kahna kabhi wo bhi to sar-e-sham 'rawish'
meri palkon pe sitaron ko utarta dekhe
Ghazal
Is se pahle ki charaghon ko wo bujhta dekhe
Shamim Ravish