Is qadar ab gham-e-dauran ki farawani hai

is qadar ab gham-e-dauran ki farawani hai
tu bhi minjumala-e-asbab-e-pareshani hai

mujh ko is shahar se kuchh dur Thahar jaane do
mere ham-rah meri be-sar-o-samani hai

aankh jhuk jati hai jab band-e-qaba khulte hain
tujh mein uThte hue KHurshid ki uryani hai

ek tera lamha-e-iqrar nahin mar sakta
aur har lamha zamane ki tarah fani hai

kucha-e-dost se aage hai bahut dasht-e-junun
ishq walon ne abhi KHak kahan chhani hai

is tarah hosh ganwana bhi koi baat nahin
aur yun hosh se rahne mein bhi nadani hai