is dukh mein hae yar yagane kidhar gae
sab chhoD hum ko gham mein na jaane kidhar gae
jo us pari ko shisha-e-dil mein kare the band
we ilm-e-ashiqi ke siyane kidhar gae
faujen junun ki dekh ke yak-bargi sabhi
is mulk-e-dil se aql ke thane kidhar gae
malum hai kisu ko ki wo aaj shoala-KHu
hum ko jala ke aag lagane kidhar gae
DhunDa bahut pa hum ne na paya unhon ka khoj
dil ko chura ke hum se chhupane kidhar gae
'hatim' ke dil ko misra-e-awwal ne KHun kiya
is dukh mein hae yar yagane kidhar gae
Ghazal
Is dukh mein hae yar yagane kidhar gae
Shaikh Zahuruddin Hatim