ek umr bhaTakte rahe ghar hi nahin aaya
sahil ki tamanna thi nazar hi nahin aaya
raushan hain jahan sham-e-mohabbat ki qataren
wo kunj-e-kam-asar nazar hi nahin aaya
main jhuT ko sachchai ke paikar mein sajata
kya kijiye mujh ko ye hunar hi nahin aaya
wo gumbad-e-be-dar tha ki diwar-e-ana thi
manzar koi bahar ka nazar hi nahin aaya
ek aisa safar bhi mujhe darpesh tha logo
kuchh kaam jahan zad-e-safar hi nahin aaya
baiThe rahe palkon ko bichhae sar-e-rahe
wo jaan-e-jahan-gasht idhar hi nahin aaya
ek pal ko jahan baiTha hun thak kar kabhi 'aKHtar'
raste mein koi aisa shajar hi nahin aaya
Ghazal
Ek umr bhaTakte rahe ghar hi nahin aaya
Akhtar Shahjahanpuri