حسن جاناں نظر نہیں آتا

حسن جاناں نظر نہیں آتا
آہ میں کچھ اثر نہیں آتا

شعلۂ غم نظر نہیں آتا
اب کوئی بھی ادھر نہیں آتا

دل شب غم سے ہو گیا مانوس
اب خیال سحر نہیں آتا

عشق احسان سے عبارت ہے
عشق ناداں نظر نہیں آتا

ہوش مندوں کی اس خدائی میں
کوئی دیوانہ گر نہیں آتا

کب سے ہیں فرش راہ دیدہ و دل
آنے والا مگر نہیں آتا

جب سے تم نے نگاہ پھیری ہے
کوئی اپنا نظر نہیں آتا

جب سے میکشؔ بہار آئی ہے
دامن دل نظر نہیں آتا