hazaron dukh paDen sahna mohabbat mar nahin sakti
hai tum se bas yahi kahna mohabbat mar nahin sakti
tera har bar mere KHat ko paDhna aur ro dena
mera har bar likh dena mohabbat mar nahin sakti
kiya tha hum ne campus ki nadi par ek hasin wada
bhale hum ko paDe marna mohabbat mar nahin sakti
jahan mein jab talak panchhi chahakte uDte phirte hain
hai jab tak phul ka khilna mohabbat mar nahin sakti
purane ahd ko jab zinda karne ka KHayal aae
mujhe bas itna likh dena mohabbat mar nahin sakti
wo tera hijr ki shab phone rakhne se zara pahle
bahut rote hue kahna mohabbat mar nahin sakti
agar hum hasraton ki qabr mein hi dafn ho jaen
to ye katbon pe likh dena mohabbat mar nahin sakti
purane rabton ko phir nae wade ki KHwahish hai
zara ek bar to kahna mohabbat mar nahin sakti
gae lamhat fursat ke kahan se DhunD kar laun
wo pahron hath par likhna mohabbat mar nahin sakti
Ghazal
Hazaron dukh paDen sahna mohabbat mar nahin sakti
Wasi Shah