حرم کا آئینہ برسوں سے دھندلا بھی ہے حیراں بھی

حرم کا آئینہ برسوں سے دھندلا بھی ہے حیراں بھی
اک افسون برہمن ہے کہ پیدا بھی ہے پنہاں بھی

نہ جا اے ناخدا دریا کی آہستہ خرامی پر
اسی دریا میں خوابیدہ ہے موج تند جولاں بھی

کمال‌ جانثاری ہو گئی ہے خاک پروانہ
اسے اکسیر بھی کہتے ہیں اور خاک پریشاں بھی

وداع شب بھی ہے اور شمع پر اک بانکپن بھی ہے
حدیث شوق بھی ہے قصۂ عمر گریزاں بھی

نہ آئی یاد تیری یہ بھی موسم کا تغیر تھا
یہ کشت شوق تھی پرورد ہائے باد و باراں بھی

یہ دنیا ہے تو کیا اے ہم نفس تفسیر غم کیجے
وہی آداب محفل بھی وہی آداب زنداں بھی

شعاع مہر ہے یا التزام زخم و مرہم ہے
یہ داغ لالہ بھی ہے شعلۂ لعل بدخشاں بھی