ہر ایک سمت اداسی کی تتلیاں جاگیں
طلوع شام سے پہلے سیاہیاں جاگیں
سفر میں دھوپ کی لذت پس غبار ہوئی
گھنے درختوں کے سائے میں گرمیاں جاگیں
دیار دل میں صداؤں کا آئینہ ٹوٹا
نواح جاں میں تعلق کی کرچیاں جاگیں
کہاں کہاں نہیں دی ہم نے رات بھر دستک
نہ کوئی باب ہی چونکا نہ کھڑکیاں جاگیں
دلوں کے بیچ تو حائل تھا برف کا موسم
نہ جسم سلگے نہ خواہش کی گرمیاں جاگیں
لہو میں لمس کے شعلے بلند ہونے لگے
بدن میں قرب کی پر شور آندھیاں جاگیں
کسی سے کم نہ ہوا نازؔ فاصلہ غم کا
کہ لوگ جتنا چلے اتنی دوریاں جاگیں
غزل
ہر ایک سمت اداسی کی تتلیاں جاگیں
ناز قادری