ہم سوز دل بیاں کریں تم سے کہاں تلک

ہم سوز دل بیاں کریں تم سے کہاں تلک
جلنے لگی ہے اب تو ہماری زباں تلک

کچھ بے کسیٔ راہرو غم نہ پوچھئے
ملتی نہیں ہے گرد رہ کارواں تلک

شرما کے لوٹ آئے نہ جب کچھ اثر ہوا
نالے ہمارے پہنچے تو تھے آسماں تلک

امید بادہ کس کو ہے خون جگر پیو
ہے محتسب کے روپ میں پیر مغاں تلک

راز و نیاز عشق کی کیا ہو خبر ہمیں
حاصل نہیں ہے دید رخ مہوشاں تلک

کس منہ سے ہم بیان کریں ماجرائے دل
ان کو نہیں پسند ہے سوز نہاں تلک

ہم کو قفس ہی راس ہوا برق کے طفیل
باقی نہیں چمن میں رہا آشیاں تلک

پائے ضعیف بعد میں چاہیں تو ٹوٹ جائیں
پہنچا دیں ایک بار تو کوئے بتاں تلک

شاید بقائے عشق اسی شے کو کہتے ہیں
ہم بھول بیٹھے غم میں زمان و مکاں تلک

یارو ہماری زیست کا قصہ ہے مختصر
محدود ہے حدیث غم دلبراں تلک

مطلق نہیں ہے کیفؔ کو دعوائے جذب دل
مقدور اس کا گریہ و آہ و فغاں تلک