hum kahan aaina le kar aae
log uThae hue patthar aae
dil ke malbe mein daba jata hun
zalzale kya mere andar aae
jalwa jalwe ke muqabil hi raha
tum na aaine se bahar aae
dil salasil ki tarah bajne laga
jab tere ghar ke barabar aae
jin ke sae mein saba chalti thi
phir na wo log palaT kar aae
sher ka rup badal kar 'baqi'
dil ke kuchh zaKHm zaban par aae
Ghazal
Hum kahan aaina le kar aae
Baqi Siddiqui