Hain sar-nigun jo tana-e-KHalq-e-KHuda se hum

hain sar-nigun jo tana-e-KHalq-e-KHuda se hum
kya ho gae kisi ki mohabbat mein kya se hum

ab tak kabhi ke miT gae hote jafa se hum
zinda hain ai 'rashid' kisi ki dua se hum

yaad aa gae jab apne gale mein wo dast-e-naz
roe lipaT lipaT ke tere naqsh-e-pa se hum

bimar-e-dard-e-hijr ki pursish se faeda
achchhe hain ya bure hain tumhaari bala se hum

paida hue hain phir se ye samjhenge ai 'rashid'
jite bache jo chaaragaron ki dawa se hum