غلط بیاں یہ فضا مہر و کیں دروغ دروغ

غلط بیاں یہ فضا مہر و کیں دروغ دروغ
شراب لاؤ غم کفر و دیں دروغ دروغ

ہزار نخل گماں ہیں ابھی نمود آثار
ازل کے دن سے ہے کشت یقیں دروغ دروغ

حدیث رشک رقیباں ہوئی ہے جس کی نظر
میں اور اس کی لگن ہم نشیں دروغ دروغ

خود اپنی مستیٔ پنہاں سے ہاتھ آتا ہے
شکار نافۂ آہوئے چیں دروغ دروغ

میں اور شکوہ سرایٔ زخم بے سببی
تو اور دشنہ تہ آستیں دروغ دروغ

ضرور کوئی نظر ہے حریف خود نگری
وہ اور بزم میں چیں بر جبیں دروغ دروغ

ملول کچھ غم بالیدگی سے ہے ورنہ
سرشت گل کو ملال زمیں دروغ دروغ

صدائیں دیں تجھے خلق خدا نے مقتل سے
تری گلی میں خبر تک نہیں دروغ دروغ