ehsas to mujhi pe kar rahi hai
chhukar jo hawa guzar rahi hai
jis ne mujhe shaKH par na chaha
KHushbu meri us ke ghar rahi hai
be-samti-e-ashk ki nadamat
is bar bhi ham-safar rahi hai
Thahra hai wo jab se rahguzar mein
miTTi meri raqs kar rahi hai
chupke se ghaDi ghaDi musafirat ki
dahliz pe panw dhar rahi hai
tare bhi nazar na aaen ghar mein
aankh aisi ghaDi se Dar rahi hai
TuTa hua aks le ke laDki
aaine mein phir sanwar rahi hai
Ghazal
Ehsas to mujhi pe kar rahi hai
Shahida Hasan