Ehsas-e-be-talab ka hi ilzam do hamein

ehsas-e-be-talab ka hi ilzam do hamein
ruswaiyon ki bhiD mein inam do hamein

KHuddariyon ki dhup mein aaram do hamein
saughat mein hi gardish-e-ayyam do hamein

ehsas-e-lams jism ki is bhiD mein kahan
kali ruten gunah ka paigham do hamein

gum-sum hisar-e-rabt mein hai lamha-e-azab
KHwahish ka karb fitrat-e-badnam do hamein

be-zariyon ko dasht-e-nafas mein sameT kar
dard-ashna junun ke ahkaam do hamein

dasht-e-sarab-e-sang hai mazi ka iztirab
gar ho sake to mustaqil aaram do hamein

saughat mein mili hai mujhe raegan shafaq
kis ne kaha hai is ka bhi ilzam do hamein

yaadon ka ek hujum hai ai 'rind' aur hum
fursat nahin hai in dinon aaram do hamein