Din ko kah den raat hum samjhe nahin

din ko kah den raat hum samjhe nahin
aap ki ye baat hum samjhe nahin

hum ki ek rehn-e-qafas bismil-nafas
aasman hain sat hum samjhe nahin

kya samajh mein aae zat-e-ma-siwa
ma-siwa-e-zat hum samjhe nahin

ishq se baz aate hum diwane kya
thi samajh ki baat hum samjhe nahin

al-gharaz hai zist marhun-e-ajal
ghayat-e-ghayat hum samjhe nahin

baat sab ki baat se hai muKHtalif
teri 'amir' baat hum samjhe nahin