دل میں خیال نرگس جانانہ آ گیا

دل میں خیال نرگس جانانہ آ گیا
پھولوں سے کھیلتا ہوا دیوانہ آ گیا

بادل کے اٹھتے ہی مے و پیمانہ آ گیا
بجلی کے ساتھ ساتھ پری خانہ آ گیا

مستوں نے اس ادا سے کیا رقص نو بہار
پیمانہ کیا کہ وجد میں مے خانہ آ گیا

اس چشم مئےفروش کی تاثیر کیا کہوں
ہونٹوں تک آج آپ ہی پیمانہ آ گیا

معلوم کس کو قیس کی دیوانگی کی شان
ہنگامہ سا بپا ہے کہ دیوانہ آ گیا

اخترؔ غضب تھی عہد جوانی کی داستاں
آنکھوں کے آگے ایک پری خانہ آ گیا