دل کو نشاط غم سے ہوں شاداں کئے ہوئے

دل کو نشاط غم سے ہوں شاداں کئے ہوئے
مجھ پر فراق یاد ہے احساں کئے ہوئے

آہیں بتا رہی ہیں کہ دیرینہ چوٹ ہے
چہرہ ہے دل کے رنج کو عریاں کئے ہوئے

جیسے خزاں رسیدہ کوئی برگ دشت میں
پھرتے ہیں دل میں درد کو پنہاں کئے ہوئے

شاہد ہیں سوز قلب کے قطرات اشک غم
پلکوں پہ ہیں چراغ فروزاں کئے ہوئے

آئی ہے پھر بہار جنوں کو ملی ہے شہہ
مدت ہوئی تھی چاک گریباں کئے ہوئے

یادوں کے گل کھلے ہیں تصور میں آج پھر
ہم آ ہے ہیں سیر گلستاں کئے ہوئے

انسانیت کا قحط ہے سرتاجؔ آج کل
مدت ہوئی زیارت انساں کئے ہوئے