dhup haalat ki ho tez to aur kya mango
kisi daman ki hawa zulf ka saya mango
us se kya kam hai kisi ke ruKH-e-zeba ki ziya
mah-o-KHurshid se kyun un ka ujala mango
jis ke baad aur na rah jae tamanna koi
mangna ho jo KHuda se wo tamanna mango
KHub hai dard ki lazzat ye baDi daulat hai
zaKHm-e-dil ke liye marham na mudawa mango
jis se chhai hui haalat ki zulmat chhaT jae
tum to KHurshid ho KHud se wo ujala mango
gar shab-e-gham ko sahar chaho banana 'asi'
kisi salma se ziya-e-ruKH-e-zeba mango
Ghazal
Dhup haalat ki ho tez to aur kya mango
Aasi Ramnagri