dard-e-dil kuchh kaha nahin jata
aah chup bhi raha nahin jata
ru-ba-ru mere ghair se tu mile
ye sitam to saha nahin jata
shiddat-e-girya se main KHun mein kab
sar se pa tak naha nahin jata
har dam aane se main bhi hun nadim
kya karun par raha nahin jata
mana-e-girya kis ki KHu hai ki aaj
aansuon se baha nahin jata
garche 'qaem' asir-e-dam hun lek
mujh se ye chahchaha nahin jata
Ghazal
Dard-e-dil kuchh kaha nahin jata
Qayem Chandpuri