دبے جو آگ تو دل سے دھواں سا اٹھتا ہے

دبے جو آگ تو دل سے دھواں سا اٹھتا ہے
مکاں کے پردے سے اک لا مکاں سا اٹھتا ہے

نظر جو ٹھہرے کوئی دم ترے سراپے میں
تو انگ انگ سے اک کارواں سا اٹھتا ہے

لہو کا سیل ہو یا زمزمہ ہو جو کچھ ہو
ہمارے دل سے ہر اک بے کراں سا اٹھتا ہے

یہ تیری بزم کی عظمت یہ اس کی ویرانی
کہ یاں سے جو بھی اٹھے اک جہاں سا اٹھتا ہے

ہماری شام کی ساعت کی لذت بے نام
کہ جرعے جرعے سے تخت رواں سا اٹھتا ہے

نہ پوچھ تشنگی اس شخص کی جو بعد‌ وصال
کسی کے پہلو سے یوں کامراں سا اٹھتا ہے

کرشمہ جوشش حسرت کا دیکھیے ہر سو
کہ شاخ شاخ سے اک آشیاں سا اٹھتا ہے