dar ki chhanw mein guzri kabhi zindan mein kaTi
umr apni yunhi takmil-e-bahaaran mein kaTi
baat us zulf-e-pareshan ki chali thi ek raat
phir to har raat meri KHwab-e-pareshan mein kaTi
shaKH-dar-shaKH jale aur nasheman ke charagh
jab koi shaKH nasheman ki gulistan mein kaTi
naqd-e-jaan de ke bhi chuk pai na qimat us ki
ek saat jo kabhi halqa-e-KHuban mein kaTi
phul aankhon mein sajae hue aaya koi
KHair-maqdam ki ghaDi sair-e-gulistan mein kaTi
Ghazal
Dar ki chhanw mein guzri kabhi zindan mein kaTi
Wali Alam Shaheen