chale le ke sar par gunahon ki gaThri
safar mein ye hai ru-siyahon ki gaThri
paDi roz-e-mahshar wahin barq aa kar
jahan thi tere dad-KHwahon ki gaThri
musafir main us dasht ka hun ki jis mein
luTi kitne gum-karda-rahon ki gaThri
jahan sus ne bahr se sar nikala
main samjha hai kashti tabahon ki gaThri
kulah-e-zari mah-e-nau ne uDa li
khuli thi kahin kaj-kulahon ki gaThri
hum un sarqa walon mein ai 'mushafi' hain
churaate hain jo baadshahon ki gaThri
Ghazal
Chale le ke sar par gunahon ki gaThri
Mushafi Ghulam Hamdani