chah ki tum se iltija ki hai
hum ne kitni hasin KHata ki hai
zulm jin doston ne Dhae hain
dil ne un ke liye dua ki hai
zulf-e-hasti sanwarne ke liye
hum ne koshish to barha ki hai
Dubte hain safine sahil par
sab inayat ye na-KHuda ki hai
is pe bandon ki hakimi kaisi
jab ye sari zamin KHuda ki hai
jaan par apni khel kar 'mansha'
karne walon ne yan wafa ki hai
Ghazal
Chah ki tum se iltija ki hai
Mohammad Mansha ur Rahman Khan Mansha