Ban-sanwar kar ho jo wo jalwa-numa koThe par

ban-sanwar kar ho jo wo jalwa-numa koThe par
charKH-e-chaarum ka nazar aae sama koThe par

tasht-az-baam na karna kahin raaz-e-ulfat
na ishaare karo ai shoKH-ada koThe par

Dore Dalen na kahin yar uDane wale
be-takalluf na yun kankawwe uDa koThe par

sab ko mahtab ka dhoka hua mahtabi par
kal sar-e-sham wo mah-ru jo chaDha koThe par

wo kaha karte hain koThon chaDhi honTon nikli
dil mein hi rakhna jo kal raat hua koThe par

chandni ho bichhi aur chand ne ho khet kiya
aur pahlu mein ho wo mah-laqa koThe par

aaftab-e-lab-e-baam ab to hue hain 'kaifi'
aankhen phir us se laDaen bhala kya koThe par