بار خاطر ہوئی یہ عمر گریزاں جاناں

بار خاطر ہوئی یہ عمر گریزاں جاناں
تجھ کو سمجھا تھا غم ہجر کا درماں جاناں

آ بتاؤں تجھے آشوب تمنا کیا ہے
کیسے کٹتی ہے یہ تار شب ہجراں جاناں

میں نے ہر غم کو غم عشق سے تعبیر کیا
غم جاں ہو یا بلا سے غم دوراں جاناں

کوئی دیکھے مری آنکھوں سے اسیری کا فسوں
گھر ہوا جاتا ہے اک حلقۂ زنداں جاناں

ایک بھی تیر نظر تیرا خطا جاتا نہیں
سب ہوئے جاتے ہیں پیوست رگ جاں جاناں

خود کشی ہے یا یہ اظہار غم فرقت ہے
خود سے ہونے لگا ہوں دست و گریباں جاناں

عمر بھر غنچۂ ہستی نہ شگفتہ دیکھا
ہم نے جیسے بھی بسر کی ترا احساں جاناں

کنج غربت میں مظفرؔ نے غنیمت سمجھا
جس قدر بھی وہ ہوا بے سر و ساماں جاناں