aur hain kitni manzilen baqi
jaan kitni hai jism mein baqi
zinda logon ki bud-o-bash mein hain
murda logon ki aadaten baqi
us se milna wo KHwab-e-hasti mein
KHwab madum hasraten baqi
bah gae rang-o-nur ke chashme
rah gain un ki rangaten baqi
jin ke hone se hum bhi hain ai dil
shahr mein hain wo suraten baqi
wo to aa ke 'munir' ja bhi chuka
ek mahak si hai bagh mein baqi
Ghazal
Aur hain kitni manzilen baqi
Muneer Niyazi