apne ham-rah jala rakkha hai
taq-e-dil par jo diya rakkha hai
jumbish-e-lab na sahi tere KHilaf
hath ko hum ne uTha rakkha hai
tu mujhe chhoD ke ja sakta nahin
chhoD is baat mein kya rakkha hai
wo mila dega hamein bhi jis ne
aab aur gil ko mila rakkha hai
mujh ko malum hai meri KHatir
kahin ek jal buna rakkha hai
jaanta hun mere qissa-go ne
asl qisse ko chhupa rakkha hai
aasmanon ne gawahi ke liye
ek sitare ko bacha rakkha hai
kaam kuchh itne hain karne ko 'jamal'
nam ko kal pe uTha rakkha hai
Ghazal
Apne ham-rah jala rakkha hai
Jamal Ehsani